இலங்கை அணியை சுருட்டி வீசிய இம்ரான் தாஹிர்

சாம்பியன்ஸ் கோப்பை கிரிக்கெட் தொடரின் இன்றைய ஆட்டத்தில் இலங்கை அணியை தென் ஆப்பிரிக்கா அணி 96 ரன்கள் வித்தியாசத்தில் எளிதாக வீழ்த்தியது.சாம்பியன்ஸ் கோப்பை கிரிக்கெட் தொடர் இங்கிலாந்து நாட்டில் ஜூன் 1 முதல் 18 வரை நடக்கிறது. இத்தொடரின் இன்றைய ஆட்டத்தில் இலங்கை – தென் ஆப்பிரிக்கா அணிகள் மோதின.இதில் டாஸ் வென்று தென் ஆப்பிரிக்காவை முதலில் பேட் செய்ய அழைத்தார் இலங்கை கேப்டன் தரங்கா. தென் ஆப்பிரிக்க அணி 50 ஓவர்களில் 6 விக்கெட்டுகளை இழந்து 299 ரன்கள் எடுத்தது. அந்த அணியின் தொடக்க வீரர் அம்லா 115 பந்துகளில் 103 ரன்கள் விளாசி தனது 25வது சதத்தை பூர்த்திசெய்தார். அவருக்கு கைகொடுத்த டூ பிளசிஸ் 70 பந்துகளில் 75 ரன்கள் அடித்து நொறுக்கினார். இலங்கை தரப்பில் ப்ரதீப் 2 விக்கெட்டுகளும் பிரசன்னா,லக்மல் ஆகியோர் தலா 1 விக்கெட்டும் சாய்த்தனர்.300 ரன்களை சேஸ் செய்த இலங்கை அணியின் தொடக்க வீரர்கள் டிக்வெல்லா 33 பந்துகளில் 41 ரன்களும் கேப்டன் தரங்கா 69 பந்துகளில் 57 ரன்களும் எடுத்தனர். பின்னர் அடுத்தடுத்து விக்கெட்டுகள் வீழ்ந்ததால், இலங்கை அணி 41.3 ஓவர்களில் 203 ரன்களுக்கு அடிபணிந்தது. குசால் பெரேரா ஒத்தையாக போராடி கடைசி வரை ஆட்டமிழக்காமல் 44 ரன்கள் எடுத்தார். இறுதியில், இலங்கை அணி 96 ரன்கள் வித்தியாசத்தில் வெற்றியை தென் ஆப்பிரிக்காவுக்கு தாரை வார்த்தது.நான்கு இலங்கை பேட்ஸ்மேன்களை பெவிலியனுக்கு அனுப்பியதுடன் லக்மலை ரன் அவுட் செய்து அசத்திய, தென் ஆப்பிரிக்க அணியின் சுழல் சிங்கம் இம்ரான் தாஹீர் ஆட்டநாயகனாக தேர்வுசெய்யப்பட்டார்.

Comments are closed.